Ka U Tuan Go Pau in Ka Pu Dongh Za Khup Mangpha khak Lungdam Kohna

Lungdam na

Ka pu tung ka lungdamna kongpulak nuam hi. U Hau Tawng in, “ka pu ka it mahmah ka neu lawm hi” a cih pen hi ka sa hi. Ka pu tawh ka hunhoih teng khempeuh zang khawm thei ka hih man in lungdam ing. Ka pu in ong thuhilh

ong pat tah zia kong gen nuam hi. Tua a hih man in ka pu ong hopih kik ning.

Pu aw, nong it na te gamtat tawh hong lak tawn tung na hih man in lungdam mahmah ing. Ka neu lai in singlaam deih lua in hong suih sak in ci in kong nget pen uham te deih nget bang in nong thudon pen in ka lungsim ong lamsang

mahmah hi. Tan sing sang in Teipi sing hoih zaw hi ci in Dawbi lui sung ah lokho khawl liang in nong zon sak te

ka lungdam hi. Mu zo lo in, ko lo ih kuan kik ciang in Lailui gam Zuanglui dung ken bang lak ah nong zon sak a,

ka nau Thangneu a ding tawh sing lam hoih mahmah khat tuak nong suih sak ban ah na khaukap hoih lai

a pei na khau ding in nong hawm sak te ka phawk den ding hi.

Lungdam ing pu aw.

Kii khawi nuam lua in, kii thang siah ong hilh in ci in kong ngen kik a, hun la het lo in a zing ciang in ka nu tawh ka

lokuan uh nong zui aa, ciangkhut ling kung sat in thei kung tung ah ki thaang siah dan ning hilh hi.

Lungdam ing pu aw.

Gun lo a i kuan a, nitak ciang in tui bual dan nong hilh a, kha muang tak in tui nong bual sak hi.

Pasal khat I kisap khat a hi tui bualdan nong hilh hi.

Lungdam ing pu aw.

Temta ka deih mahmah a, mawtaw ciampek inn nuai pan in nong la khia a, lailui khua ah vai khak in isek sak hi.

Ka deih tem nong guat hi.

lungdam ing pu aw.

Sim ah lo I kuan a, sun ciang in khuum nuai ah khawl in, lawm na ngai nai hiam? Ci a nong thu dot ka lungsung ah teng den hi. Tua ni anong gen thu te lawm na ngaih theih ma in ong gen ning maw nong cih te phawk den ing.

A ki sap na mun ah na gen zel ning maw pu.

Lungdam mahmah ing pu aw.

Bawng ih cin zel hun lai in, gamlak ah khua sak gamtat dan ding nong pat tah te. Tui dawn tui ngawl dan

ding nong hilh te, gam kang mai ah khensat na bawl dan ding nong hilh te man pha mahmah hi.

Lungdam ing pu aw.

Nong piak bawng no ong lian semsem in, kei zong Tedim pan in pil sin zom thei ding in sang ma ong ki hong hi. Inn pan puapial zawh na ding sum om lo a hih man in nong piak bawl laa zong gol ta a hih man in ka zuak uh a

tua tawh sang kah ding in lamsap in ka zang hi. Ma nong pat sak hi pu aw.

Lungdam ing pu aw.

Nong it na gamtat tawh nong gen zaw a, ka lungtang in mu hi.

Lungdam ing pu aw.

Na hun nunung pen ah zong na tu na ta te ngai in ong nusia zo het lo cih ka nu in ong gen hi. Pumpi kigam lat na in

itna melma sak het lo cih nong lak hi. Nong lah khiat itna khempeuh hang in

lungdam mahmah ing pu aw.

Thawh kik ni zingsang ciang dawn bang tuah kik ni pu aw. Pu aw mangpha.

Na Tu pa,

Tuan Go Pau