Zomi sungah laphuak, lasa siam ahi Lengtong Pauno in ala at na ah, “Zomi ka hih zumpih kei ning, mi sang’ a niam zaw ding aa Pasian hong bawl hi tuan kei, Zomi bang kampau, Zomi bang gamta ning.....” ci in la iin na sa hi.
Zomi Bang' ii cih ciangin amasa in Zomi te bang ci nuntak aa bangci bang in khuasa uh hiam cih ii en masa ding hi. Taanglai in ii pu ii pa te in anungta Pasian a theihkhak loh uh hangin dawi leh kau bia na hi sam lo uh aa, a biak apaai uh To te tungah citak tak in a upna uh hoihtak in lencip in
ahoih pen gamtatna tawh gamta in thupha na ngah sawm uhhi. Tua ban ah khuasung ah a cimawh, a lukhat deuh te ahuh theih zah in na huh in ki panpih diamdiam uhhi. Lo zolo khat a om ciangin khuasung hausa te in a hat ahi theizah kaikhawm in acimawh anla zolo ding khuasung
innlukhat te lo ah lawm va ki zui uh aa itna leh deihsakna tawh ma na pangkhawm lialiai uhhi. Tua ahih manin tuhun ciangdong Zogam a tam zaw khua te ah “lawm-an-nek pawi” ci-in ki-itna an kuang te ki umkhawm hi.
Ih pu ii pa te in a sepna khempeuh vuah itna mah na bulphuh den ahihmanin Zomi te’ etteh ding ciaptehna lim iin Vaphual na koih uhhi. Vaphual bangci nuntak aa ki bangci iit uh cihpen ii vek in ii theihkhitsa hi.
Tu hun khangthak Zomi te in Zeisu’ thuhilhna te sang iin Christian a ki ci pawl te ii hi aa, itna leh
mawhmaisakna mah bulphuh in a nei te ii hihi. Tua ahih lehii ki itna in bang ciang hi mawk hiam.... ii pu ii pa te anungta Pasian atheikhalo te ki-itna bang ii nei zo hiam... ngaihsut
huai ka sa mahmah hi. Zomi te’ ngeina ah mopi, molak ciangin zong a bawngbawng, innkuankuan in kipii in ki la aa sepna khempeuh ah a ki kum khawm, a semkhawm liai liai Zomi te ii hi se hi.
Tua ahih manin paunak in bang na ci hiam cih leh,“Nupa ki lungtuak khua khat in zolo, khuakhat ki lungtuak khuakua in zolo” cih bangin khanglui te in sepkhopna leh kipumkhatna ii thahat zia te khangsawn momno te in tuu bang aa ciing aa paai bang ii khuah den ding in hih bangin a si ngeilo ding kammal te hong nusiat toto uh ahihi.
Minam lian, minam picing ii cih te iin a minam pau, lai te leh ngeina te a kemsiam minam te hi aa kemsiam bek thamlo in a zang to pahpah leh midang te nangawn a hawmsawn leitung a ki zelsak minam te a hi uhhi. Pasian in ei Zomi te thupha hong pia iin pilna lam, siamna lam leh neih leh lam ki khangto mahmah ta aa, gamlian gamthupi ah zong sum zong paai zong bek hilo pilsin zong ki tamta hi.
Tuipi gal, gamlian a tung Zomi pawlkhat te in ii ngeina, pau leh lai te thupi ngaihsut nawnlo in “Zomi Bang in” gamta nawnlo in Zomi te’ ki itna te nangawn a khahsuah Zomi ki om ta cih ka muh ciangin nakpi takin dahhuai leh khasiathuai ka sa mahmah hi. Zomi ki-itna lim ahi Vaphual te phawk kha nawnlo iin sanggampih Zomi te nangawn ki neumuh thei kha mawk hi. Zomi laphuak, lasa siam Thawnkham in,"Thangho leh Liando, na tangthu hong sut kik dih un, Zomi te sungah ki-itna hong lak kik un.... Na muhtheih na sanggam a it lo pi in muhtheihloh Pasian it ing ci ngam lai.....” acih mah bangin tuni in khangthak Zomi te in ii tangthu neih te a mawkna hilo aa, Thangho leh Liando ki itna te phawk kik in
Zomi bangin a kipumkhat, a ki it diamdiam ding Zomi te ii hihlam ii ki phawk kik ding ka lunggulh mahmah hi.
Ei Khangthak Zomi pawl ee leh,“Takkheh .... Pasal !!!... Zomi buang.... Zomi bangin .....” ii ci ngam tek ding hiam..?
Zogam in na itna, na lungsim leh na pumpi hong lunggulh mahmah hi. Zomi te in Zomi bangin a gamta ding a ki it dingin lam en in hong ngak hi................
“Zomi bangin kei ka piang, Zomi bangin ka nungta... Zomi bangin ka si ding....” -Tg Lungtup
No comments:
Post a Comment