Ka Pa Ka Neulawm

(Hih thului pen inn tawh ka ki gamlat, khual pan in Pate' Ni ka zat laitak iin ka Pa ka phawkna, ka it ka ngaihna, leh ka Pa tungah lungdam ka kohna iin ka at hi.)

Pian kum te zong ong tam to semsem ta aa, mun leh mual zui in lawm leh gual zong ki laih to zel hi. Lawm lui te tawh ki khen zel iin lawm thak leh gual thak tawh ki khawll iin leinun ki zang to zel hi. Lawm citak muanhuai leh lawm hoih a om mah bangin, khuahun zui lawm zong na om ve ve hi.

Lawm tampi ii neu kei zongin ii lawm neih te lak pan in neulawm te mah ki phawk den aa, ih ki khen khak zenzen hangin om na munmun pan in nunnuam kholhkhop lai ni te lung ah mang thei mahmah lo iin ki ngai pha
deuh hi.

Kholhpih lawm te tawh thucin thutang ka kikum thei zel uh aa, "tu ciang na nun sungah na lawm hoih pen, muanhuai pen kua ahi tam?" ci in ong ki dong thei zel aa, "Ka Pa ka Neulawm hi aa ka lawm muanhuai pen zong hi pah!" ka cih ciangin nui ngeingai mawk uh aa ciamnuih bawl peuh ong sa uhhi. Dik hi, ka  pa pen ka neulawm taktak hi aa, mi khempeuh in zong ii pa te pen ii neulawm ciat ahih lam ki phawk kha lo thei hi.

Ka Nu sung pan ka pian khiat tung iin ka pa in ong tawi pah aa khutkim khekim a suakkhia ong muh ciangin a nuamna khitui luang keukeuh hi. Lawm hoih khat a mu ta hi. Inn sung vai te a hawmpih ding a ki kuppih ding pasal muahhuai leh lawm muanhuai a hi dingin ong pahtah to hi.

Ka Pa in annek tuidawn  dan hong hilh aa, kampau zat dan ding leh mi lak ki hel dan ding hong hilh den hi. Khual zin gam vak ciangin khuasak luheek dan ding zong ong ki sinsak aa mi picing khat a hi dingin ong makaih hi. Ka nuam ka kipaak hun ciangin ong lungdampih aa, ka lungkiat thaneem ciangin ka kiangah ong om den aa ka thaneem lungkiatna teng ama hatna tawh ong tuam iin kei hong domsang hi.

Khual gamla ka zin ding ciangin lawm muanhuai ka muhloh khak ding ong lung-hi-mawh pih ahih man in lawm hoih pen Jeisu kiang ong ap iin thu ong ngetsak hi. Ka pilsin na dingin ka Pa in amuh ngei nailoh, a tun ngei nailoh na mun sang hoih mun hoih te ah kei hong kha aa sum le paai nei ta kei leh samkhau  phel liang mah in ong hanciam pih hi. Ka pa tawh ka om khawm loh hun in zong a lungtang in ka gamtat thei aa, a si pai in ka nunzia hong tel hi.

"Ka Pa Ka Neulawm" hi aa koi mun koi mun ka tung zongin lei tung ah amah sangin lawm hoih leh muanhuai pen ding omlo hi.

"Pa" aw tukum Pate' Ni ah nang tawh om khawm aa kei mah teekteek in lungdam ko iin kong pahtawi theih loh hangin hih ka lungsim sunkhiatna hih lai in nang mah kong pahtawina leh kong lungdamkohna hi aa Kei aa ding in leitung ah  lawmhoih pen leh lawm muanhuai pen na hihna in a tawntung hi ding hi.

Ka Neulawm taktak ka Pa aw hong it ong ngai, ong phawk mahmah ingh. Na lawmhoih pen leh na ki paakna ahi dingin kei mah na tapa in sepna bawlna khempeuh ah nong pattahsa leh ong hilhsa thu te mangngilh hetlo iin ka gamta ding aa innkuan min leh na min a lamsang ka hih zawhna ding thu kong ciam hi.